-------------

(this is wat I used to be)

Sehra me yu hi chala ja raha tha,
Mai bilkul akele jiya ja raha tha.
Ye ankhein tarasti hain, socha nahi tha,
Meri bhi hasti hai, socha nahi tha.
Fir ek din jaise suraj ug aya,
Andheri gali me diya jagmagaya.
Ye kaisa ujala, ye kya roshni thi,

Achanak hi meri bhi duniya haseen thi.

(How is she like?)

Ankhon me uski ajab roshni hai,
Chehre pe uske gajab saadgi hai.
Kehta nahi kuch, hai mehsoos hota.
Ke baato me uski, to kuch baat bhi hai.
Dekhoon mai jab bhi wo hasta hi milta,
Ke gam jaise uske nahi paas bhi hai.
Kya uske hi jaisa hu mai bhi ho sakta,

Uthe mere dil me ye jajbaat bhi hain.

(What’s special about her?)

Ye duniya ko dekho, gamo se bhari hai,
Har ek dil pe chaayi, kya murdaanagi hai.
Gamo ko to usne bhi jhela hi hoga,
Ke duniya ke khelo ko khela bhi hoga.
Par ek baat hairan karti hai mujhko,
Jo duniya se usko juda kar rahi hai.
Pareshaan duniya na raato ko soti,
Wo din me bhi sapne naye bun rahi hai.

(What do I think looking at her?)

Jagi bheed me jhapki leti wo ladki,
Hai masoom bachhon si soti wo ladki,
Kabhi neend me hi behekne wo lagti,
Kabhi girte girte sambhalti wo ladki.
Magar uski ye baat mujhko hai bhaati,
Wo soyee hui bhi rahe muskurati.
Duniya kya soche nahi usko chinta,
Hai kaisi ya alhad si bebaak ladki.

(What she might be doing in her dreams)

Wo khwabon ke sagar me gote lagati,
Wo taaron se sapno ka aangan sajati
Wo kis yaad me kho ke duniya bhulati,
Kahaan ko chali hai, wo kya gungunati
Wo apni hi dhun me magan naachti hai
Meri bhi nigahein usse baanchti hain.
Agar sun sake to tu sun meri dhadkan
Tere dil me thodi jagah mangti hai.

(My dilemma)

Mere dil ki kashti kaha hai bhatakti,
Ye ankhein meri kyon teri raah takti
Kahu pyar isko, ya kuch aur samjhu,
Ye kaisi paheli, ye kyo na sulajhti.
Magar chahta hu, na ho naam iska,
Bhale jo bhi ho chahe anjaam iska,
Ke gujre jo lamhe mere teri janib
Mai kaise chukaunga ehsaan iska

(My only message to her)

Agar tum jo meri kabhi ho na pao,
Ke sapno ko mere, jo sanjo na pao,
Kasam tumko hai, meri parwaah na karna,
Khud se hansi ko juda tum na karna.
Magar jaate jaate ek ehsaan karna,
Agar ho sake to kabhi yaad karna,
Tha jis shakhs ko tumne hasna sikhaya,
Tum jab bhi hasogi, samjho wo muskuraya.